Në hapësirat e Infoqendrës së BE-së në Shkup, redaksia e lajmeve Portalb e nënshkruajti Kartën për raportim etik për zgjedhjet, të propozuar nga Këshilli për Etikë në Mediumet e Maqedonisë (KEMM).
Kartën në fjalë, e nënshkruajtën shumica e mediumeve më të mëdha të Maqedonisë, Alsat M, Kanal 5, Tv Sitel, Alfa Tv, etj.
Drejtoresha ekzekutive e Këshillit për Etikë në Mediumet e Maqedonisë, Marina Tuneva, bëri thirrje për informim të drejtë, të saktë dhe paanshmëri duke i respektuar të gjitha rregullat gazetareske.
“Gjendemi në një krizë të mediumeve, publikut i duhen informata të sakta dhe të li, për këtë arsye, KEMM, e ka parë të arsyeshme që ta ndërmerr këtë iniciativë”, tha mes tjerash, Tuneva.
“Ne, gazetarët, redaktorët, dhe drejtuesit e mediave, duke respektuar të drejtën e publikut për të qenë i informuar në mënyrë objektive, të drejtë dhe me kohë, me përgjegjësi dhe vetëdije të plotë për rolin e mediave lidhur me zgjedhjet e ardhshme parlamentare në vend, pranojmë këtë Kartë dhe pajtohemi që gjatë punës së mediave tona”, me këto fjalë u betuan shumica e mediumeve të Maqedonisë.
Nënshkruesit e kësaj Karte pajtohen se do t’u përmbahen parimeve të saj, dhe do të angazhohen në mënyrë aktive për afirmimin e etikës dhe profesionalizmit gjatë raportimit.
Kjo kartë parasheh që nënshkruesit t’u përmbahen këtyre parimeve:
Parimi i vërtetësisë dhe objektivitetit
- Që nënkupton kërkimin e të vërtetës dhe raportimin korrekt, përmes transmetimit të fakteve në mënyrë të qartë. Në rast të publikimit të informacioneve të pasakta, media do të bëjë çmos që t’i korrigjojë informacionet e tilla.
Parimi i ekuilibrimit
- Që nënkupton paraqitjen e qëndrimeve dhe pikëpamjeve të ndryshme në kontekstin e vërtetë dhe duke mos anuar nga cilido kandidat, parti a koalicion.
Parimi i dallueshmërisë së qartë midis informacioneve dhe komenteve
- Që nënkupton se informacionet do të formësohen në atë mënyrë që publiku do ta ketë të qartë dallimin midis fakteve, vlerësimeve e opinioneve.
Parimet e ndershmërisë dhe neutralitetit
- Që nënkupton se media do të përdorë qasje të ndershme në marrjen e informacioneve dhe në paraqitjen e tyre, duke shmangur paraqitje sensacionale të temave dhe ngjarjeve, si dhe të supozimeve të cilat do të mund ta mashtronin publikun.
Parimi i solidaritetit profesional Gjatë punës së saj, media do ta nxisë solidaritetin reciprok dhe pluralizmin e qëndrimeve, dhe nuk do të veprojë në atë mënyrë që do të nënkuptonte qërim hesapesh me mediat dhe kolegët tjerë.
Parimi i pavarësisë redaktuese dhe integritetit profesional
- Media detyrohet të raportojë në mënyrë të pavarur prej çfarëdo pikëpamjeve personale, interesave të jashtme dhe ndikimeve që do të mund ta rrënonin pavarësisë redaktuese dhe integritetin profesional.
Parimi i respektit dhe tolerancës
- Që nënkupton respektimin e dinjitetit, reputacionit, të drejtave dhe integritetit personal të individëve gjatë informimit të publikut. Në raportimin e saj, media nuk do të përdorë stereotipe, paragjykime dhe nënçmime në asnjë mënyrë dhe nuk do të përdorë gjuhën e urrejtjes.
Parimi i lirisë dhe përgjegjësisë
- Që nënkupton se liria ju imponon përgjegjësi mediave për formën dhe përmbajtjen e porosive që ua drejtojnë publikut, dhe për pasojat që rrjedhin prej tyre mbi mjedisin më të gjerë shoqëror.