Në SHBA deri më tani 43 persona e kanë humbur jetën si pasojë e motit të keq i cili ka përfshirë vendin gjatë javës së fundit, raporton Anadolu Agency (AA).
Moti i keq që goditi shtetet jugore të SHBA-ve tashmë ka kapluar edhe pjesët qendrore dhe veriore të vendit, ndërsa vazhdon të rritet numri i të vdekurve.
Nga Agjencia për menaxhimit të emergjencave thonë se si pasojë e reshjeve të mëdha të dëborës, shiut dhe tornadove brenda një jave në të gjithë vendin 43 persona kanë vdekur.
Në shtetin jugor Misisipi nga moti i keq gjetën vdekjen 10 persona, në Tennesse, Arkansas dhe Alabama 9, në Teksas 11, kurse në Illinois dhe Missouri 13 veta humbën jetën.
Shkaku i vdekjeve në Missouri ishin përmbytjet, ndërsa sipas policisë së qytetit Alburquerque moti i keq shkaktoi rreth 180 aksidente trafiku. Në Teksas 50 mijë banorë kanë mbetur pa energji elektrike, ndërsa në New Mexico 10 mijë.
Njoftohet se shtresa e borës në New Mexico ka arritur në 60 cantimetra.
Si rezultat i kësaj në shtetet amerikane Teksas, Oklahoma, Missouri dhe New Mexico është shpallur gjendja e jashtëzakonshme. Gjithashtu në shumë shtëpi dhe objekte të tjera ka dëme të mëdha. Për shkak të dëmeve të mëdha në veri të Teksasit, prefekti Greg Abbott 4 lagje i shpalli “zonë katastrofike”.
– Temperatura të pazakonshme në lindje të vendit –
Në jug dhe në pjesët qendrore të SHBA-ve moti i keq bëri që të “paralizohet” jeta, mirëpo në shtetet lindore janë shënuar temperatura rekorde.
Temperatura e ajrit në Uashington ka arritur në 23 grad Celsius dhe janë temperatura rekorde në 50 vitet e fundit. Në qytetin Orlando të shtetit Florida që nga viti 1921 për herë të parë temperatura ka arritur në 30 grad Celsius, ndërsa në New York në 22 grad Celsius.