LR-PDSH dhe RDK përkrahin protestën për ndotjen e ajrit në Tetovë

S. B.

8 years ago

Eco Guerilla duke protestuar kundër ndotjes së ajrit

Aleanca për Shqiptarët ka mbajtur sot një konferencë të përbashkët për media, përmes së cilës iu dha përkrahje protestave të paralajmëruara për ditën e premte kundër ndotjes së ajrit në Tetovë. Ekipi i departamenteve të shëndetësisë nga të dyja partitë LR PDSH dhe RDK si dhe dy kryetarët e degëve të Tetovës Arif Selami dhe Binas Pajaziti thanë që gjendja e ajrit në Tetovë është në kuota jashtë normales dhe kërkuan përkrahje prej simpatizantëve dhe gjithë anëtarëve të Aleancës për Shqiptarët për protestën e së premtes.

“Nëpërmes kësaj konference të përbashkët, Aleanca për shqiptarët vlerëson se gjendja apokaliptike e ndotjes së ajrit në Tetovë nga ana e Jugohromit kërkon reagimin më të ashpër të të gjithë njerëzve të vullnetit të mirë pavarësisht proveniencës politike sepse dëmtimi i shëndetit nuk njeh ngjyrim politik”, tha Fadil Mehmeti, nga Departamenti i Shëndetësisë të RDK-së, ndërkaq Agron Palloshi nga departamenti i Shëndetësisë të LR-PDSH tha se Aleanca fuqishëm do të mbështes protestën e paralajmëruar për të premten nga Eco Guerila.

Kryetari i degës së Tetovës Arif Selami shtoi se as kryetarja e komunës së Tetovës nuk duhet të amnistohet nga kjo gjendje e rëndë me ajrin e ndotur në Tetovë. Duke parafrazuar disa Ligje, Selami tha se edhe kryetarja e Komunës dhe kryetari i Këshillit Komunal duhet të bartin përgjegjësi dhe të përkrahin protestën për ajrin.

Kryetari i degës së Tetovës i RDK-së Binas Pajaziti e vlerësoi si gjenocid gjendjen e krijuar nga ajri i ndotur, sepse sipas tij, ky është një shkatërrim i madh i brezave që vijnë i fëmijëve tanë, prandaj bëri thirrje te të gjitha përkrahësit ë Aleancës për Shqiptarët që të premten të dalin masovikisht në protestë për të parandaluar këtë gjenocid.