Mesazhet që solli sekretari amerikan, John Kerry, gjatë vizitës së tij të shkurtër në Kosovë, janë përcjellë me komente të ndryshme nga analistë e politikanë.
Kerry në një konferencë për media nga aeroporti i Prishtinës “Adem Jashari” , tha se SHBA nuk do të përkrahte asnjëherë marrëveshje që cenojnë sovranitetin e saj.
Ai po ashtu foli edhe për raportet në mes pozitës dhe opozitës, duke theksuar se gazi nuk duhet të jetë asnjëherë pjesë e Kuvendit të Kosovës, si dhe të dy palët si pozita ashtu edhe opozita duhet të bëhen bashkë për interesa të vendit.
Sipas zëvendëskryeministrit, Hashim Thaçi, mesazhet e Kerry-t ishin të qarta dhe se përkundër sfidave globale, SHBA mbetet e përkushtuar si partnere e Kosovës.
“Ata që na ndihmuan të çlirohemi dhe të pavarësohemi po na ndihmojnë edhe të forcohemi dhe të bëhemi anëtarë të BE-së dhe NATO-s. Nëse bëhemi bashkë dhe dialogojmë në mes vete në institucionet që i kemi krijuar, asgjë kurrë nuk do të na ndalë. Kerry vlerësoi lidershipin e Kosovës dhe guximin e shtetit tonë që të përballet me sfida dhe të shënojë sukses në ndërtimin e shtetit”, ka shkruar Thaçi në Facebook.
Edhe aktivisti i Vetëvendosje!-s, Ylli Hoxha ka komentuar vizitën e sekretarit amerikan, duke thënë se Kerry nuk e kritikon “Zajednicën”, kuar atë e kanë pranuar Isa Mustafa e Hashim Thaçi.
“Kur IsaHasha e shohin si të mirë marrëveshjen me Serbinë e me Malin e Zi, mos t’pret kush që John Kerry e kritikon. Nëse e bëjmë në kabull ‘Zajednicën’, na e bëjnë përhajr edhe amerikanët! Amerikanet e kanë përshëndetë edhe Republika Srpskën, pasi atë e ka pranuar Alija Izetbegovic!”, ka shkruar Hoxha.
Ndërsa analisti, Lumir Abdixhiku, ka thënë se mesazhet e shtetit më të rëndësishëm dhe përkrahësit tonë më fundamental ishin të qarta.
“Për opozitën: dhuna, gazi e rrahagjokit nuk kanë vend në parlament. Dialog; në vend të kërcënimit nëse mendohet të arrihet diçka. Për pozitën: korrupsioni e krimi politik të hetohet deri në nivelet më të larta; kushdo qofshin ata. Asnjë proces integrues i vendit s’guxon të mbetet peng i tyre”,ka shkruar Abdixhiku, në Facebook.
Ai më tej ka shkruar se këndej ka aventuristë e revolucionarë mjaftueshëm për ta provuar e testuar edhe rreshtimin kundër SHBA-ve; ka pasur gjithnjë, por sipas tij, ka edhe pushtetarë që për të shpëtuar veten nga gjykimi – special apo ekonomik pak ka rëndësi – janë në gjendje të sakrifikojnë gjithçka.
“Por, më shumë për fat se për meritë, pranë veti kemi një aleancë që duhet shfrytëzuar si sytë e ballit. Kosovarët nuk kanë luks as të durojnë kapësit e sotshëm e as t’i mbështesin zhbërësit e nesërm. Për të dyjat, natyrisht, duhet mend e punë shumë – punët e shtëpisë nuk na i bën askush; këdo paçim në krah”, ka shkruar Abdixhiku.