Kanë reaguar sërish tifozët e grupimit “Ballistët”, një nga grupimet më të zjarrta shqiptare në mbështetje të Kombëtares dhe Shkëndijës së Tetovës.
Tifo-grupi në fjalë “shfryn” kundër Federatës Shqiptare të Futbollit për lënien jashtë të pjesëtarëve të këtij grupimi për ndeshjen Shqipëri-Serbi.
Ja deklarata e plotë e Ballistëve:
Kuptojmë që kjo ndeshje është më shumë se futboll, por ju kujtojmë organeve përkatëse që secila ndeshje që ne bëjmë në këtë kampionat sllavo-maqedonas është më shumë se futboll. Ndoshta për ju ndodh për herë të parë të hasni ndeshje me tension të lartë, ku përplasen kombësia, feja e politika.
“Të nderuar, ne këto i kemi përjetuar çdo ditë të jetës sonë në këtë vend ku jetojmë. Do pyesnit pse? Të nderuar, qysh nga formimi i KOMBËTARES SË ILIRIDËS, klubit tonë KF SHKËNDIJA, në çdo ndeshje, tentohej pengimi dhe dëmtimi i këtij simboli, edhe i vetë shqiptarëve në ILIRIDË! Prandaj pabesia që Shteti Shqiptar dhe organet përkatëse që ua bënë tifozëve është e paarsyetueshme! Me këtë gjest është treguar qartë që nga ana e FSHF-së dhe organeve të tjera përkatëse nuk jemi të mirëseardhur në Elbasan!
Po t’i bindeshim vendimit të FSHF-së apo edhe ta pranonim sadopak me mirëkuptim, do të ishte vetë tradhëtia ndaj gjithë tifozëve, pasi tribuna jonë përbëhet nga shqiptarë të mirëfilltë dhe një gjest i till do të pohonte deklaratën nga FSHF-ja, në të cilën thuhej që tifozët nuk lejohen, pasi që shihen si “RREZIK NDAJ KOMBËTARES”. Vlerën e kësaj ndeshjeje më shumë ia dijnë ata të cilët kurrë nuk e panë veten në shtetin e vet dhe po të njëjtëve ju ia mohuat prezencën! Kurse për djelmoshat që atë ditë do të dalin në fushë, porosia e vetme që kemi ndaj tyre është se, pa marrë parasysh se me çfarë rezultati mbaron ndeshja, ata ishin, janë dhe gjithmonë do të jenë krenaria jonë!”