Zëdhënësi për shtyp i Kremlinit Dimitriy Peskov, në lidhje me shkeljen e hapësirës ajrore turke nga një avion rus tha se Rusia do të kontrollojë të dhënat në notë-protestën e dhënë ndaj Ambasadorit të Rusisë në Ankara, raporton Anadolu Agency (AA).
Peskov në një deklaratë për mediat tha se “ambasadori ynë ka marrë një notë-protestë pasi është thërritur në Ministrinë e Jashtme të Turqisë. Ne do të kontrollojmë (notë-protestën) e dhënë atje”.
Peskov duke theksuar se operacionet ajrore të Rusisë në Siri nuk do të ndikojnë negativisht në marrëdhëniet Ankara – Moskë është shprehur se “Marrëdhëniet dypalëshe me Turqinë nga pikëpamja e marrëdhënies mjaft gjithëpërfshirëse dhe reciprokisht të dobishme kanë një bazë shumë solide”.
Më parë ishte njoftuar se me 3 tetor ditën e shtunë në orën 12.08 një avion luftarak i Rusisë në rajonin Yayladağı në qytetin Hatay kishte shkelur hapësirën ajrore turke.
Në një deklaratë me shkrim nga Ministria jashtme turke ishte theksuar se avioni rus i cili kishte shkelur hapësirën ajrore të këtij vendi u ndoq nga dy avionë F-16 të Turqisë derisa avioni rus kaloi përtej hapësirës turke.
Në deklaratë theksohet gjithashtu se Ambasadori rus në Ankara ishte thërritur në Ministrinë e jashtme ku shkelja në fjalë është protestuar fort si dhe i është kërkuar që të mos përsëritet më kjo lloj shkeljeje, në të kundërt Rusia do të jetë përgjegjëse për ndonjë ngjarje që mund të ndodhë padëshiruar.