Lorik Cana do të jetë në ndeshjen me Serbinë. Është vetë babai i kapitenit të Kombëtares, Agim Cana që në një komunikim me Supersport shprehet me siguri se Loriku do t’ja dalë për të qenë në fushë në ndeshjen e 8 tetorit.
Në sinkron të plotë me deklaratën e të atit të tij, është dhe komunikimi më i fundit i Canës në profilin e tij në Twiter, ku kapiteni i Kombëtares ka postuar një foto të kaviljes së dëmtuar bashkë me diciturën “kthehem së shpejti”.
Pas dëmtimit që pësoi në ndeshjen e mesjavës kundër Lille, Cana ende vazhdon të ndiejë dhimbje në kaviljen e këmbës së majtë, por po përpiqet me të gjitha forcat për të qenë gati për një nga takimet më të rëndësishme të këtyre eleminatoreve , dhe njëkohësisht një ndër më të ndierat për tifozët kuqezi. Cana vazhdon rikuperimin dhe nëse nuk do të jetë gati në 100% nuk do të rrezikojë në takimin e kësaj të shtune për skuadrën e tij Nantes, në përballjen me Nice, por synimi i tij është që në cdo mënyrë të jetë i gatshëm për trajnerin De Biasi në përballjen me Serbinë pasi kërkon që me cdo kusht të japë kontributin e tij në përballjen e 8 tetorit ku Shqipëria luan një pjesë të mirë të shanseve të saj për tu kualifikuar në kampionatin Europian të vitit të ardhshëm që luhet në Francë.