Në takimin e koalicionit për luftë kundër ekstremizmit të dhunshëm, iniciativë e SHBAsë për luftë kundër Shtetit Islamik në Irak dhe Siri (ISIS-ISIL), ministri i Punëve të Jashtme të Maqedonisë Nikolla Poposki deklaroi se Maqedonia do të vazhdojë të kontribuojë në aktivitetet për sigurimin e paqes në Lindjen e Afërt. Ndërkohë, Kryeministri grek Aleksis Cipras e ka bojkotuar takimin e koalicionit, për shkak të emërimit të Maqedonisë nën emrin kushtetues.
“Kemi pozitë të mirë si vend e cila ka mundësi të kontribuojë dhe është pjesë e koalicionit në luftën kundër ekstremizmit dhe manifestimeve të ndryshme në terrorizëm. Në kornizat e Kombeve të Bashkuara, Maqedonia ka pozitë të mirë t’i afirmojë këto qëllime edhe nga roli që e kemi në kontekstin rajonal si kryesues me Iniciativën Evropiane Qendrore. Mendoj se shumica e diskutimeve që deri tani u zhvilluan edhe në nivel bilateral dhe multilateral çojnë drejt asaj se do të pritet angazhim i rritur. Nga ana e Maqedonisë porosi e tillë me siguri do të dalë dhe ne plotësisht do të jemi më aktivë në këtë pjesë”, deklaroi ministri Poposki në NjuJork për Televizionin e Maqedonisë.
Gjatë takimit, vendet anëtare të koalicionit u munduan për bashkëpunim ende më të madh në luftën kundër ekstremizmit të dhunshëm, që do të thotë edhe këmbim në kohë i informatave për lëvizjen e luftëtarëve të huaj. Shtetet e Bashkuara të Amerikës sollën sanksione financiare kundër 15 përkrahësve të SHI, ndërsa në Evropë është formuar Forum evropian i rrjeteve sociale për ndalim të rekrutimit përmes internetit. Koalicioni prej 60 shteteve fitoi tre vende të reja anëtare, Tunizinë, Nigerinë dhe Malejzinë. Sekretari i përgjithshëm i Kombeve të Bashkuara Ban Kimun paralajmëroi se në asamblenë e përgjithshme të ardhshme do të prezantojë plan për luftë globale kundër ekstremizmit të dhunshëm deri te të gjitha vendet anëtare të organizatës botërore, njofton MIA.