Ekspertë shqiptarë të fushës së pensioneve dhe problemeve të emigrimit mendojnë se kriza greke është shkaktuar veç të tjerash edhe nga një keqmenaxhim i skemës së sigurimeve shoqërore, gjë që prek edhe mijëra shqiptarë që jetojnë në Greqi.
Naim Balluku, specialist në fushën e pensioneve, thotë në një intervistë për KosovaPress se skema e pensioneve dhe kriza greke janë të lidhura me njëra-tjetrën, kjo pasi pensionet në Greqi janë të larta 700 deri në 900 euro, njerëzit kanë dalë në pension të rinj dhe me pak vite pune deri në 25 vjet, dhe të gjitha këto kanë shkaktuar probleme në buxhet dhe në ekonominë e Greqisë. E gjitha kjo situatë rrezikon edhe pensionet që mund të përfitojnë emigrantët shqiptarë për të cilët ende nuk ka një marrëveshje mes dy shteteve tona për ti mbrojtur dhe bashkuar vitet e tyre të punës. Shumica e tyre nuk plotësojnë as 15 vite pune, dhe me kaq pak vjetërsi nuk mund të përfitojnë pension as në Greqi dhe as në Shqipëri, madje dhe me reformën e re të pensioneve në Shqipëri, emigrantët nuk kanë të drejtë të përfitojnë pension social, vetëm në rast se ndryshon ligji me ndonjë amendim.
Në këndvështrimin e specialistit e gjitha kjo tregon se ka pasur një keqmenaxhim të skemës së pensioneve në Greqi, dhe një informalitet të lartë, nga e cila vuajnë edhe emigrantët shqiptarë. Nga ana tjetër, problem janë edhe pengesat që po shfaqin bankat së fundmi, për të tërhequr kursimet e qytetarëve. Lidhur me atë se a rrezikojnë emigrantët tanë të mos i marrin lekët që kanë në bankat greke, Balluku thotë se kjo varet nga kreditorët.
Por emigrantët tanë që po harxhojnë dhe ato pak kursime që kanë grumbulluar atje në Greqi, i pret një situatë e vështirë edhe në Shqipëri, pasi kanë shitur dhe ato se çka kanë pasur, dhe do bëhen barrë për shtetin. Nga ana tjetër, ata rrezikojnë të mbeten pa pension pasi nuk plotësojnë kriteret, duke nisur që nga vjetërsia e punës.
Balluku thotë se në këtë aspekt kthimi i emigrantëve mund të karakterizohet edhe nga zhvillime pozitive si për shembull hapja e bizneseve këtu falë përvojës që ata kanë marrë në emigracion, por kjo duhet të shoqërohet me masa dhe lehtësira nga shteti ynë për integrimin e tyre; si subvencione; reduktim taksash etj.
Nga ana tjetër pavarësisht krizës, jo të gjithë emigrantët shqiptarë mund të kthehen, por gjysma pritet të vijnë, pasi kanë humbur vendet e punës, mbarojnë kursimet dhe s’kanë mundësi të rrinë atje, ndaj dhe sytë e tyre janë të drejtuar nga shteti shqiptar. Kjo krizë e ka dëmtuar shumë Greqinë dhe emigrantët, dhe do dojë shumë kohë të rikuperohet. Pensioni mesatar në Greqi është 750 euro dhe ka kosto të madhe për shtetin. Edhe raporti ndërmjet pensionistëve dhe kontribuuesve po përkeqësohet vazhdimisht pasi janë 2 milionë e 500 mijë ndërkohë që janë në punë 3 milionë e 500 mijë grekë kështu që raporti është 1.33 punëtorë për një pensionist.