Apple tashmë e ka filluar prodhimin e gjeneratës së re të telefonit të saj iPhone, i cili besohet se do të quhet iPhone 7 ose iPhone 6S, raporton Blooberg.
Sipas prestigjiozes Bloomberg thuhet se Apple kësaj radhe e ka filluar më herët prodhimin e telefonit të saj të famshëm.
Burimi i njëjtë i informacionit edhe njëherë e konfirmmon se gjenerata e re e iPhone do të vijë me teknologjinë Force Touch, të cilën Apple e ka lansuar së fundmi në pajisjet e tjera sikurse në orën Apple Watch dhe modelin më të ri të MacBook.
Ekrani i pajisjeve të Apple me Force Touch është i ndjeshëm ndaj presionit, që nënkupton se mund të tregojë se sa fort jeni duke e shtypur ekranit, dhe kupton se në cilën pjesë jeni duke e shtypur dhe rrëshqitur mbi të.
Por kjo nuk është hera e parë që flitet për gjeneratën e re të iPhone me Force Touch, pasi ka qenë edhe analisti i famshëm i KGI Securities, Ming-Chi Kuo, i cili ka thënë se ky funksion do të jetë njëra ndër risitë kryesore që do t’i sjell modeli i ri i iPhone.
Bloomberg e ka përsëritur se ekranet e modelit të ri të iPhone do të vijnë në dimensionet prej 4.7 dhe 5.5” dhe me pak ndryshime në dizajn nga iPhone 6.
Por, pas Force Touch, iPhone 7 ose iPhone 6S pritet të sjell edhe përmirësime të tjera sikurse kalimi nga kamera me 8MP në atë me 12MP.
Nëse Apple tashmë e ka nisur prodhimin e iPhone-it të ardhshëm kjo domethënë se lansimi i tij zyrtar do të bëhet në shtator, ndërsa i modeleve të reja të iPad në tetor. Por janë edhe disa muaj që duhet pritur, për ta kuptuar edhe më saktë këtë gjë. (Telegrafi)