Aktori tetovar Burhan Amiti në përmbyllje të Festivalit në Manastir solli një freski, si me tekstin të adaptuar sipas motiveve të dramës “Hamlet” të Shekspirit, ashtu edhe me interpretimin, por edhe me ilustrimin muzikor kryekëput me motive nga folklori burimor shqiptarë që në mesin e shikuesve shkaktoi emocione mallëngjyese, ashtu siç do të shkaktonte edhe teksti origjinal i Shekspirit.
Në ditën e martesës së Hashametit (personazhi i monodramës),kris lufta, kështu që ky nuk ia del
dot së bashku ta kalojë natën e parë. Shkon në luftë. Lufta si të gjitha luftërat për pasoja lë shkatërrina, pas përfundimit të luftës, kthehet në shtëpi ku ballafaqohet me pasojat katastrofale. Shtëpia e shkatërruar nga jashtë, brenda pa frymë njeriu. I ati ka pas vdekur, kurse e ëma është martuar për xhaxhanë e Hashametit. Fati i njëjtë si i Hamletit të Shekspirit.
Hashameti i traumatizuar dhe i thyer nga lufta, fillon të jetojë si Hamleti, të kërkojë momente për ta dënuar aktin të këtillë të xhaxhait dhe të ëmës. Është interesant dhe prekës dialogu në mes Hashametit dhe të ëmës, kur ajo e qorton për sjelljen të ftohtë ndaj saj. Ky i përgjigjet: ”Ti,gruaja e xhaxhit tim flet me djalin tënd”. Fjali kjo që depërton thellë në emocionet e çdo njeriu. Edhe Hashameti,ashtu si Hamleti, me shokët organizon një shfaqje të shkurtër ku e përshkruan ngjarjen më të ndyrë të njerëzimit.
Pas grindjes të ashpër me të ëmën dhe reagimit të xhaxhait (njerkut),në gjendje afekti rastësisht vret këtë të fundit, me se edhe e përmbush amanetin. Monodrama përfundon ashtu siç përfundon edhe te “Hamleti”. Hashameti viziton varrin të prindit dhe ia lajmëron plotësimin e amanetit.
Për atë se si u prit dhe u përcoll shfaqja shqiptare në skenën e Pallatit të Kulturës në Manastir, dëshmi e vërtetë janë duartrokitjet dhe urimet nga shikuesit e pranishëm.
(Q.H)