Shpresoj që Maqedonia nuk do ta humbas rekomandimin për çeljen e negociatave me Bashkimin Evropian.
“Teorikisht mund të ndodhë të mos ketë rekomandim për ndonjë vend, por unë nuk di ndonjë rast të tillë me një shtet që kalon nëpër procesin e anëtarësimit. Pres raport të saktë, të drejtë dhe të balancuar nga Komisioni Evropian për përparimin e Maqedonisë”, thotë ambasadori britanik në Maqedoni, Christopher Yvon, në intervistën e së dielës për Radio Evropa e Lirë.
Ai grupin e punës për zbatimin e rekomandimeve nga raporti i komisionit ad-hok për ngjarjet e 24 dhjetorit, e sheh si shembull për përmirësimin e dialogut politik.
Yvon thotë se tani është momenti kyç që grupi punues t’i zbatojë të gjitha rekomandimet e raportit.
“Mendoj se punët kyçe nga raporti i komisionit janë rekomandimet, ndërsa qëllimi që unë e shoh me zbatimin e raportit, është që të sigurohemi se ngjarjet të cilat i kemi parë më 24 dhjetor në ekranet tona televizive, nuk do të përsëriten dhe se ekziston përpjekje e liderëve politik nga të gjitha partitë që të bëjnë çdo gjë të mundshme që ta mësojnë mësimin e 24 dhjetorit. Mendoj se ky është qëllimi i vërtetë i raportit, e posaçërisht në pjesën e rekomandimeve. Mendoj se ajo që duhet pasur kujdes është që raporti të zbatohet. Me siguri, raportin e kanë të gjitha partitë politike në Maqedoni dhe se ai është në interes të qytetarëve të Maqedonisë dhe atje ku Britania e Madhe ka të drejtë për votë rreth diskutimeve në Bashkimin Evropian, do të jemi të kujdesshëm për përparimin e zbatimit të raportit”, tha ambasadori Yvon.