Bisedimet për zgjatjen e bashkëpunimit me zikalterit janë ndërprerë, pasi palët janë ende larg me pretendimet e tyre.
Samir Handanoviç i hap dyert Romës. Portieri slloven është treguar i gatshëm për t’u transferuar te verdhekuqtë në përfundim të sezonit, që do të thotë se është vënë në dyshim serioz rinovimi i kontratës me Interin. Bisedimet për zgjatjen e bashkëpunimit me zikalterit janë ndërprerë, pasi palët janë ende larg me pretendimet e tyre. Handanoviç ka kërkuar tre milionë euro në sezon, ndërsa aktualisht përfundon 2.2 milionë euro. Drejtuesit zikaltër nuk kanë ndërmend t’ia rrisin pagën, për të ruajtur bilancin në kuadër të “Fair-Play-t” financiar.
Nga kjo situatë kërkon të përfitojë Roma, që ka nisur kontaktet për ta bindur 30-vjecarin që të transferohet në kryeqytet. Handanoviç pëlqehet shumë nga drejtori sportiv Sabatini, por edhe nga portieri 38-vjecar De Sanctis, i cili ka qenë shok skuadre me sllovenin kur të dy luanin te Udineze.
Portieri aktual i Romës në mënyrë konfidenciale është shprehur se në Itali mund të jetë zëvendësues vetëm i Buffon dhe i Handanoviç, çka lë të kuptohet se bashkëjetesa mes të dyve te verdhekuqtë është krejtësisht e mundshme.
Për të arritur te Handanoviç, Roma mund të përfshijë në marrëveshje edhe kartonin e Mattia Destros, që në përfundim të sezonit do të përfundojë periudhën e huazimit te Milani. Roma duhet të veprojë me shpejtësi dhe këmbëngulje, sepse për Handanoviç ka interesim edhe nga Premier League, vecanërisht nga Manchester City.