Media kroate raportoi ditën e enjte se policia ka konfirmuar se kanë arrestuar Vukadinin 55-vjeçar në një pikë kalimi kufitar në fshatin Strmica, ndërsa ai po kthehej nga Bosnja dhe Hercegovina më herët këtë javë.
Vukadini, i cili pretendohet se ka qenë kapiten i ushtrisë së Republikës së Krajinës Serbe, një entitet jo i njohur serb që ekzistonte midis viteve 1991 dhe 1995 në Kroaci, është i dyshuar për krime lufte ndaj pesë kroatëve në fshatin Oklaj pranë qytetit të Kninit në tetor 1993.
Zyra e prokurorit të shtetit në Split po heton nëse ai, së bashku me dy burra të tjerë, i kanë trajtuar në mënyrë çnjerëzore civilët kroatë, dhe kanë abuzuar fizikisht dhe verbalisht me ata.
Ligji kroat i bën zyrtarët ushtarakë përgjegjës për sigurimin e të drejtave të civilëve që jetojnë në territorin e pushtuar. Vukadini dyshohet se është përgjegjës për krahinat e Kninit dhe Drnisit, ku ndodhet edhe Oklaji.
Ai u arrestua në kufi ditën e hënë dhe do të rrijë në paraburgim në Split deri në përfundim të hetimeve për shkak të frikës se ai mund të arratiset.
Vukadini ka nënshtetësi serbe dhe kroate, por u largua nga Kroacia në gusht të vitit 1995, pasi Operacioni Stuhia i Ushtrisë Kroate i dha fund Republikës jetëshkurtër të Krajinës Serbe.
Që atëherë, ai ka jetuar në Beograd, por herë pas here viziton Kroacinë, ku ka një shtëpi afër Kninit.