Ish-kryeministri Sali Berisha u ka bërë thirrje qytetarëve nga faltorja e Kuvendit që të ngrihen të gjithë në protesta për ta çuar vendin drejt zgjedhjeve të parakohshme.
“I bëj thirrje shqiptare të ngrihen fuqishëm … të çojmë vendin drejt zgjedhjeve të parakohshme si kusht i të gjitha kushteve për të shpëtuar procesin e integrimit nga kthetrat e mafias. Asgjë s’ka më të fortë se parimet që ne besojmë”, tha Berisha.
Berisha akuzoi qeverinë se ka zgjedhur kërcënimin ndaj Europës.
“Kjo qeveri është qeveri e hakmarrjes për drejtësi nga kreu i saj tek ministrat. Rama kërcënoi gjyqtaren e gjykatës së Kukësit Gërxhaliu duke i thënë të pres këmbët. Nuk duhet të qeshësh se është nën me fëmijë, është shërbëtore e vendit ajo që kryeministri i thotë të pres këmbët. Arjan Çanit i dërgoi ushtarët e Shullazit. Kush ia hodhi kokën dhisë Telnis Skuqit. Konstandini i partisë i hodhi kokën e dhisë Telnis Skuqit”, tha Berisha.
Sa i përket integrimit në Bashkimin Europian, ai tha se kjo ëndërr sa vjen e zbehet.
“Ta shpëtojmë vendin nga ministrat që vjedhin vendin me tendera… Integrimi për shqiptarët është një horizonte që largohet çdo ditë. Të gjitha kriteret e integrimit të ndërtuara për 2 dekada po çmontohen, ndaj iu bëj thirrje të protestojmë dhe ta çojmë vendin drejt zgjedhjeve të parakohshme”, tha ish-kreu i PD-së.
Berisha foli edhe për situatën në burgje, për të cilën shprehu shqetësim pak ditë më parë edhe Avokati i Popullit. Berisha tha se vetëm në një qeli izolohen 20 persona duke e cilësuar këtë si një skandal.
“Burgje dhe hekura, këto i qetësojnë vuajtjet e tij shpirtërore. Sipas raporteve zyrtare të institucioneve thuhet se në një qeli grupohen 20 vetë, sikur të ishin kafshë dhe jo njerëz”, tha më tej Berisha.