Gazeta Cumhuriyet në Turqi sot ka publikuar disa karikatura të “Charlie Hebdo”, ndërkohë policia ka rritur masat e sigurisë në godinën e kësaj gazete në Shishli, raporton Anadolu Agency (AA).
Një nga gazetat me tirazhin më të madh në Turqi Cumhuriyet sot ka publikuar disa karikatura të revistës “Charlie Hebdo” e cila u bë objekt i një sulmi terrorist javën e kaluar në Paris të Francës. Si rrjedhojë policia e Stambollit ka rritur masat e sigurisë në godinën që ndodhet në zonën Shishli të kësaj gazete.
Ndërkohë që policia ka dislokuar autoblindat rreth godinës së gazetës, rrugët dhe rrugicat që të çojnë tek godina e gazetës në Shishli janë mbyllur për trafikun. Policia ka bërë të ditur se masa të tilla të sigurisë janë marrë për shkak të publikimit të karikaturave.