Anëtarët dhe aktivistët e BDI-së së Kumanovës, kërkojnë sqarim nga kreu i BDI-së, për vonesat në procesin e zgjedhjeve të brendshme. Tashmë katër muaj, dega në Kumanovë ka hyrë në procesin e zgjedhjeve, kandidati është caktuar, mirëpo nuk është zgjedhur. Kandidati i vetëm për kryetar të kësaj dege, Xhemail Rexhepi pyet pse vonohen zgjedhjet brenda partiake. Rexhepi shtoi se faji për ngecjen e proceseve në Kumanovës, e ka struktura e vjetër e degës, transmeton Alsat.
“Struktura e vjetër, vetëm ikin qosheve. Ikin qosheve, i bëjnë listat, marrin emrat e njerëzve që duhet punësuar, ata emra nuk shkojnë dhe punësohet emra të tjerë. Nuk e di cila është arsyeja e kësaj, qytetarët kërkojnë sqarim, ndërsa ne nuk dimë çfarë t’i themi. Komandant Shqiponja, për çështjen e Kumanovës, për asnjë çast dhe asnjë milimetër nuk ka kthim mbrapa. Këtë le ta din të gjithë”, tha Xhemail Rexhepi, Kandidat për kryetar dege.
Edhe mbështetësit e Rexhepit shprehin shqetësimin e tyre për përfaqësimin e dobët dhe injorimin e kësaj dege.
“Të vetëdijshëm për vështirësitë në periudhën e kaluar, anashkalimin e familjeve të dëshmorëve, invalidëve të luftës dhe ish ushtarëve të UCK-së, nga strukturat maqedonase por edhe nga mos serioziteti i disa funksionarëve nga njësia numër 2, është interes i përgjithshëm kombëtar por edhe i BDI-së që procesi të përcillet me reforma dhe rritje të kualitetit dhe përfaqësimit.Fakti që jemi në muajin e 4 të zgjedhjeve, pa u respektuar datat e dhëna nga vetë koordinatori i njësisë zgjedhore, vështirëson funksionimin e mirëfilltë të degës”, tha Ferat Begu, Invalid i luftës.
Alsat M tentoi të marrë qëndrim nga kreu i BDI-së, Ali Ahmeti, mirëpo, shefi i kabinetit të tij, Artan Grubi tha se nuk është në rrjedhë me zhvillimet e fundit nëpër degë. Nisma për mbajtjen e Kuvendin Zgjedhor kishte pasur edhe më parë por kishte dështuar për shkak të pakënaqësive të manifestuara që ishin përcjellë edhe me incidente mes fraksioneve.