Komunat nuk mund të merren vesh për pikat rajonale të grumbullimit të mbeturinave, dhe kjo është arsyeja pse në Maqedoni nuk fitohet energji nga mbeturinat. Ky është qëndrimi i ekologëve nga “Go Green” të cilët thonë se për të pakësuar mbeturinat nuk mjafton vetëm seleksionimi dhe riciklimi.
“Çdo kryetar komune bën matematikën e vet për komunën e vet dhe në bisedimet e këtij procesi mendoj se këtu ka gjëra që në njëfarë mënyre ngecin dhe nuk mund të vazhdohet procesi i tillë”, tha Antonio Jovanovski, Go Green.
Fakti që komunat nuk mund të arrijnë marrëveshje me njëra tjetrën, ndihet më së shumti tek banorët e Tetovës, Gostivarit dhe Shkupit, ku pikat e grumbullimit të mbeturinave janë vetëm komunale dhe për shkak të kësaj nuk mund t’i përmbushin nevojat e industrisë për sigurimin e sasisë së mjaftueshme të mbeturinave, të cilat para se të përdoren si energji, duhet të përpunohen në mënyrë shtesë. Nga ana tjetër, nga ministria e mjedisit jetësor shprehen se nuk mund të ndikojnë tek komunat për rritjen e bashkëpunimit, pasi ajo nuk ka kompetenca për një gjë të tillë.