Familjarë, të afërm, deputetë të Partisë Demokratike, gazetarë dhe dashamirës janë mbledhur në përkujtim të njëvjetorit të ndarjes nga jeta të Sokol Olldashit, ku binte në sy mungesa e kreut aktual të Partisë Demokratike, Lulzim Basha dhe ish-kryetarit të demokratëve, Sali Berisha.
Ceremonia përkujtimore e quajtur “Me Sokolin” u drejtua nga deputetja demokrate, Majlinda Bregu dhe në të merrnin pjesë edhe figura të tjera të njohura të PD-së si Mesila Doda, Oerd Bylykbashi, Astrit Patozi, Aldo Bumçi, por edhe Ambasadori Amerikan në Tiranë, Alexander Arvizu, miqësia e të cilit me Sokol Olldashin ishte publike.
Astrit Patozi do të deklaronte se ceremonia ishte organizuar për të mbledhur njerëzit më të afërt të të ndjerit.
“Sokol Olldashi i mungon Partisë Demokratike, edhe pse ajo e ka një kryetar. Ai i mungon edhe qeverisë edhe pse ajo e ka një kryeministër”, u shpreh Patozi. / Top Channel