Sezoni veror turistik në Strugë, përveç elementeve pozitive, veçohet edhe me një karakteristikë shumë negative dhe të dëmshme për imazhin e qytetit. Ashtu si çdo vit edhe sivjet, në rrugët e qytetit ndjeshëm është shtuar numri i lypsarëve kryesisht të komunitetit rom, të cilët në format nga më të ndryshmet kërkojnë lëmoshë nga kalimtarët, shkruan portali Drini.mk.
Vazhdimisht thuhet se fluksi i lypsarëve vjen nga qytetet e tjera të Maqedonisë të cilët tentojnë të shfrytëzojnë lëvizshmërinë e shtuar të njerëzve në Strugë, por më tragjike është fakti se në të shumtën e rasteve këto lypsarë të moshave të ndryshme duke përfshirë këtu fëmijë që nga miosha 3 vjeçe deri në pleq dhe plaka të msohës së thyer, dyshohet se shfrytëzohen nga persona të tretë të cilët i sjellin ato në Strugë dhe më pas ua marrin të hollat e fituara në formë lëmoshe.
Një rast i ngjashëm është hasur mbrëmë në qytetin e Strugës, ku disa qytetarë kanë vërejtur dhe fotografuar një furgon me targa të Shkupit, i cili ka qenë i mbushur me njerëz të moshave të ndryshme të cilët i kanë zbritur në Strugë, përballë Pallatit të Kulturës, nga ku më pas janë shpërndarë për të lypur në rrugët kryesore të qytetit. Rasti në fjalë është fotografuar nga kalimtarët e rastit.
Ministria për punë dhe politikë sociale e cila është kompetente për të ndërmarrë masa ndaj këtij fenomeni të turpshëm, siç duket nuk është fare e interesuar për të ndërmarrë diçka konkrete në qytetin e Strugës, ku ky problem tashmë është i përvitshëm dhe tejet negativ.
